കാറിന്റെ ബാറ്ററി ചാര്ജ് ആവര്ത്തിച്ച് തീരുന്നുണ്ടെങ്കില് അതിന് പിന്നില് പല കാരണങ്ങളുമുണ്ട്. പലരും ഈ പ്രശ്നം അവഗണിക്കുകയും എല്ലായ്പ്പോഴും ബാറ്ററി ജമ്പ്-സ്റ്റാര്ട്ട് ചെയ്യുകയും ചെയ്യുന്നു. ഈ പ്രശ്നം ആവര്ത്തിച്ചാല് അത് ഉടനടി പരിശോധിക്കേണ്ടത് പ്രധാനമാണ്. അല്ലെങ്കില് കാര് റോഡില് നിന്നുപോകുകയും കൂടുതല് ബുദ്ധിമുട്ടുകള്ക്ക് കാരണമാവുകയും ചെയ്തേക്കാം. ഇടയ്ക്കിടെ ബാറ്ററി തകരാറുണ്ടാകാനുളള കാരണങ്ങളും ശ്രദ്ധിക്കേണ്ട സംഗതികളും എന്തൊക്കെയാണെന്നറിയാം.
ബാറ്ററി ടെര്മിനലുകളുടെ നാശമാണ് ഏറ്റവും സാധാരണമായ കാരണം. കാലക്രമേണ ബാറ്ററി ടെര്മിനലുകളില് കോറോഷന് എന്നറിയപ്പെടുന്ന ഒരു വെളുത്തതോ പച്ചയോ നിറത്തിലുള്ള പാളി രൂപംകൊള്ളുന്നു. ഇത് ബാറ്ററിക്കും വാഹനത്തിലും ഇടയിലുള്ള ശരിയായ വൈദ്യുത പ്രവാഹത്തെ തടയുന്നു. ഇത് ബാറ്ററി വേഗത്തില് നശിക്കാന് കാരണമാകുന്നു. അതിനാല് ഇടയ്ക്കിടെ ബാറ്ററി ടെര്മിനലുകള് വൃത്തിയാക്കുകയും അയഞ്ഞ വയറുകള് പരിശോധിക്കുകയും ചെയ്യേണ്ടത് പ്രധാനമാണ്.
മറ്റൊരു പ്രധാന കാരണം ആള്ട്ടര്നേഷന് തകരാറിലായതായിരിക്കാം. വാഹനം ഓടിക്കൊണ്ടിരിക്കുമ്പോള് ബാറ്ററി ചാര്ജ് ആയി നിലനിര്ത്തുന്ന ഭാഗമാണ് ആള്ട്ടര്നേറ്റര്. ആള്ട്ടര്നേറ്റര് ശരിയായ അളവില് ചാര്ജ് ചെയ്യുന്നുണ്ടോ എന്ന് മനസിലാക്കാന് ഒരു മെക്കാനിക്കിനെക്കൊണ്ട് ആള്ട്ടര്നേറ്റര് വോള്ട്ടേജ് പരിശോധിക്കുന്നത് നന്നായിരിക്കും.
മൂന്നാമത്തെ കാരണം കാറില് ബാറ്ററിയില് നിന്ന് തുടര്ച്ചയായി വൈദ്യുതി വലിച്ചെടുക്കുന്ന എന്തെങ്കിലും ഓണാക്കി വയ്ക്കുന്നതാണ്. ഉദാഹരണത്തിന് ഹെഡ് ലൈറ്റുകള്, ഇന്റീരിയര് ലൈറ്റുകള്, അല്ലെങ്കില് മ്യൂസിക് സിസ്റ്റം എന്നിവ അബദ്ധത്തില് ഓണായി പോയേക്കാം. ഇതിനെ 'പാരാസിറ്റിക് ഡ്രെയിന്' എന്നും വിളിക്കുന്നു. ചിലപ്പോള് ഡാഷ് ക്യാമുകള് അല്ലെങ്കില് ഇന്വെര്ട്ടറുകള് പോലുള്ള അധിക ആക്സസറികള് വാഹനം ഓഫായിരിക്കുമ്പോള് പോലും ബാറ്ററിയില്നിന്ന് ചാര്ജ് വലിച്ചെടുക്കുന്നത് തുടരും. അതിനാല് വാഹനം പാര്ക്ക് ചെയ്യുന്നതിന് മുന്പ് ലൈറ്റുകളോ ഉപകരണങ്ങളോ ഓണാക്കിയിട്ടില്ലെന്ന് ഉറപ്പാക്കുക.
നാലാമത്തെ കാരണം ബാറ്ററിയുടെ കാലപ്പഴക്കമാകാം. ഒരു കാര് ബാറ്ററിയുടെ ആയുസ് സാധാരണയായി 3 മുതല് 5 വര്ഷം വരെയാണ്.ഈ കാലം കഴിയുമ്പോള് ചാര്ജ് നിലനിര്ത്താനുള്ള കഴിവ് കുറയുകയും അത് ഇടയ്ക്കിടെ തീര്ന്നുപോകാന് കാരണമാകുകയും ചെയ്യും. അതിനാല് ഇത്തരം പ്രശ്നം ഒഴിവാക്കാനായി ബാറ്ററി നേരത്തെ മാറ്റിസ്ഥാപിക്കുന്നത് നന്നായിരിക്കും.
അഞ്ചാമത്തെ കാരണം ചെറിയ ദൂരം മാത്രം വാഹനമോടിക്കുന്നതായിരിക്കാം. വാഹനം കുറച്ച് സമയത്തേക്ക് സ്റ്റാര്ട്ട് ചെയ്ത് ഉടന് ഓഫാക്കുമ്പോള് ബാറ്ററി പൂര്ണമായും ചാര്ജ് ചെയ്യാന് സമയംലഭിക്കുന്നില്ല. ഇത് ക്രമേണ ബാറ്ററിയെ ദുര്ബലപ്പെടുത്തുന്നു. കൂടാതെ കടുത്ത ചൂടോ കടുത്ത തണുപ്പോ ബാറ്ററിയുടെ പ്രവര്ത്തനത്തെ ബാധിച്ചേക്കാം. കാരണം ഈ രണ്ട്തരം കാലാവസ്ഥയും ബാറ്ററിയുടെ രാസ പ്രക്രീയകളെ ബാധിക്കുന്നു.
കാറിന്റെ ബാറ്ററി ഇടയ്ക്കിടയ്ക്ക് തീര്ന്നുപോകുന്നുണ്ടെങ്കില് ഇക്കാര്യങ്ങളൊക്കെ പരിശോധിക്കുന്നത് ഉറപ്പാക്കുക. ടെര്മിനലുകള് വൃത്തിയാക്കല്, ആള്ട്ടര്നേറ്റര് പരിശോധിക്കല്, ഏതെങ്കിലും ലൈറ്റോ ഉപകരണങ്ങളോ ഓണ് ആണോ എന്ന് പരിശോധിക്കല്, ബാറ്ററിയുടെ ലൈഫ് പരിശോധിക്കല്, ദീര്ഘദൂരം വാഹനം ഓടിക്കല് ഇവയെല്ലാം പ്രശ്നം ഒഴിവാക്കാന് സഹായിക്കും.\
Content Highlights :There can be several reasons why a car battery repeatedly drains—corroded terminals, a faulty alternator, an old battery, and so on.